قىزىق نوقتا خەۋەرلىرى

ئەدەپ-ئەخلاقتىن ياتلاشمىساق

2017-07-11 13:55:41     مەنبەسى: شىنجاڭ خەلق رادىيو ئىستانسىسى   

ئابدۇۋايىت نىياز

مەلۇم بىر كۈنى ئۈرۈمچىنىڭ خوتەن كوچىسىدىكى ئاپتوبۇس بېكىتىدە ئۇزاققىچە ئاپتوبۇس ساقلىشىمغا توغرا كەلدى. ئاپتوبۇس كېچىككەچكە، بېكەتتە ئادەم كۆپ ئىدى، ئاپتوبۇسنىڭ كېلىشى بىلەنلا ئىشىكتىن قىستىلىشىپ خېلى تەسلىكتە ئاپتوبۇسقا چىقتۇق. ئورۇندۇق يېتىشمىگەنلەر تۇتقۇچلارنى تۇتۇپ ئۆرە تۇرۇشتۇق. شۇ ئەسنادا سىگنالى كۈچلۈك بىر يان تېلېفوننىڭ سايرىشى بىلەن ئالدىدا ئولتۇرغان بىر ئايالنىڭ سەت گەپلەر بىلەن قارشى تەرەپكە قىلغان كايىشلىرى ئاپتوبۇس ئىچىنى بىر ئالدى:
   - ھەي قاملاشمىغان... ئەمدى ئۇنىڭ بىلەن ئاجراشماقچى بولدۇڭما، مەن بۇرۇنلا ئۇ بىر لۈكچەككەن، بولدى قىل، دېسەم، ئۇنىڭغا تەگكىنىم تەگكەن، ھېلىمۇ ئۇنىڭغا تېگىپ بولدۇم، دەپ توسقىنىمغا ئۇنىمىدىڭ، ئەمدى بىر بالىلىق بولۇپلا ئاجراشماقچىمۇ سەن،  مېنىڭ كارىم يوق، بالاڭنىمۇ كۆزۈمگە كۆرسەتمە، ئۇنى ئاتىسىغا بەر، ئۇنى باققۇچىلىكىم يوق...، دەپلا كەتتى. ئاپتوبۇستىكى ئەر - ئايال، قېرى - ياشنىڭ دىققىتى قوزغالدى بولغاي، ئۇلار بىر - بىرىگە مەنىلىك قاراشتى، پىچىرلاشتى:
   - بۇ ئايال بۇنداق گەپلەرنى ئۆيىدە قىزى بىلەن كۆرۈشكەندە دېسە ئانىلىق سۈپىتىگە، ئىناۋىتىگە ياخشى بولماسمىدى؟!
   - بۇ، ئۇنىڭ ئاپتوبۇستىكىلەرنى كۆزگە ئىلمىغىنى، ئەدەپسىزلىكى ئەمەسمۇ...
   - ئاچچىققا پايلىمىغاندا ئۇنىڭ كۆزىگە كۆرۈنمەي قالدۇق -تە، «ئىسنىڭ ئاچچىقىنى مورا بىلىدۇ»ئەمەسمۇ، -دېدى بىرەيلەن سالا تەلەپپۇزىدا.
   ئاپتوبۇس يەنە بىر بېكەتتە توختىشى بىلەن ھېلىقى ئايال ئاپتوبۇستىن چۈشۈپ كەتتى. مەن ئويلاپ، ئۇنىڭ ئاپتوبۇستىكى شۇنچە ئادەمنى كۆزگە ئىلمىغاندەك تېلېفوندا نومۇسلۇق گەپلەر بىلەن قىزىنى تىللىغانلىقىدىن ئەپسۇسلاندىم. چۈنكى، خەلقىمىزنىڭ ئەجدادلاردىن داۋاملىشىپ، مىللەت جامائىتىمىزنىڭ ھەربىر ئەزاسى ئەمەل قىلىشقا تېگىشلىك، شۇنداقلا كۆپلەر ئەمەل قىلىۋاتقان سۆز - ھەرىكەتتە، ئەخلاق - پەزىلەتتە مەدەنىي، قائىدە - يوسۇنلۇق بولۇشتەك ئەدەپ ئۆلچىمى بۇ ئايالنىڭ ئەمەلىيىتىدە قىممىتىنى يوقاتقانىدى.
بىلىشىمىز كېرەككى، بىز ئايرىم ھالدا يەككە شەخس، سىرتتا، جامائەت سورۇنلىرىدا شۇ جامائەتنىڭ تەركىبىي قىسمى. شۇنداق ئىكەن، ھەرقانچە ئېغىر خاپىلىققا يولۇققاندىمۇ جامائەتنىڭ ئەخلاق ئۆلچەملىرىگە خىلاپلىق قىلىشقا ھەققىمىز يوق. بولۇپمۇ پۇقرالار ئەخلاق قۇرۇلۇشى يولغا قويۇلغان ئون نەچچە يىلدىن بۇيان كونىچە ناچار قاراشلارنى تۈگىتىپ، مەدەنىي تۇرمۇش قارىشىنى تىكلەپ، ياخشى پەرزەنت تەربىيەلەش، ئەخلاقلىق، ئىقتىدارلىق ئادەم يېتىلدۈرۈشتىكى «ياخشى ئانا» بولۇشتەك ئىجابىي پائالىيەتلەر كۈچەيتىلمەكتە. شۇنداق ئىجتىمائىي ئاساس ۋە شارائىتتا ھەممەيلەن، ئالدى بىلەن، مىللىتىمىزنىڭ ئەدەپ - ئەخلاق مىزانلىرىنىڭ، ئىجتىمائىي ئەخلاق تەلەپلىرىنىڭ قىممىتىنى ئوبدان چۈشىنىش ۋە ئۇنىڭغا ھەرقانداق زامان، ماكاندا ئەھمىيەت بېرىش، يۇقىرىقىدەك بولمىغۇرلۇقلاردىن قەتئىي خالىي بولۇشقا تىرىشىش ھەر بىرىمىزگە، بولۇپمۇ يۇقىرىقىدەك كىشىلىرىمىزگە نىسبەتەن تەخىرسىز تەلەپ، ئەلۋەتتە.
 

[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى