قىزىق نوقتا خەۋەرلىرى

 10 مىڭ چاقىرىم يول بېسىلغان ئائىلە زىيارىتى

2017-08-24 18:47:02     مەنبەسى: شىنجاڭ خەلق رادىيو ئىستانسىسى   
 خاربىن شەھىرى بىلەن غۇلجا شەھىرىنىڭ ئارىلىقى 5000 كىلومېتىر كېلىدۇ، خاربىن شەھەرلىك 73- ئوتتۇرا مەكتەپنىڭ ئوقۇتقۇچىسى خۇ جىنرۈي شىنجاڭغا ئائىلە زىيارىتىگە كېلىش ئۈچۈن، ۋەتىنىمىزنىڭ شەرقىي شىمالىدىن غەربىي شىمالىغا كەلدى.
 
  خۇ جىنرۈي 8- ئاينىڭ 11- كۈنى سەھەردىلا خاربىندىن ئايروپىلانغا ئولتۇرۇپ يولغا چىقىپ 3 سائەتكە يېقىن ئۇچقاندىن كېيىن، جىنەنگە كەلدى، ئاندىن جىنەندىن يەنە ئايروپىلانغا ئولتۇرۇپ، 5 سائەت ئۇچۇپ ئۈرۈمچىگە يېتىپ كەلدى.
 
  لېكىن، 8- ئاينىڭ 12- كۈنى ئۈرۈمچىدە ياغقان يامغۇر خۇ جىنرۈينىڭ ئائىلە زىيارىتىنى «ئاقسىتىپ» قويدى، ئۇ ئولتۇرماقچى بولغان ئايروپىلان 5 سائەت كېچىكتى. تېخىمۇ يامان بولغىنى شۇكى، ئايروپىلان غۇلجىغا يېتىپ بارغاندىن كېيىن، قونالماي يەنە ئۈرۈمچىگە قايتىپ كەلدى، ئايروپىلان قايتىدىن ئۇچقاندا، سائەت 19 بولغانىدى.
 
  مۇشۇنداق ئەگرى- توقايلىقلار بىلەن، خۇ جىنرۈي ئولتۇرغان ئايروپىلان غۇلجىغا يېتىپ بارغاندا، ئۇ ھېرىپ ھالىدىن كەتكەنىدى. خۇ جىنرۈي ئايروپىلان كۈتۈش بىناسىدىن ئەمدىلا چىقىشىغا، ئۆزىگە تونۇش بىر سىما ئۇنىڭ ئالدىغا يۈگۈرۈپ كېلىپ، ئۇنى چىڭ قۇچاقلاپ تۇرۇپ: مۇئەللىم، ئاخىر كەلدىڭىز، دېدى. ئۇلار خۇددى ئۇزاق يىللاردىن بېرى كۆرۈشمىگەن تۇغقانلاردەك قۇچاقلىشىپ كۆرۈشتى.
 
  خاربىن شەھەرلىك 73- ئوتتۇرا مەكتەپ شىنجاڭ بۆلۈمى تەييارلىق سىنىپىنىڭ ئوقۇغۇچىسى نەسىمە غاپپار خۇ جىنرۈينىڭ ئوقۇغۇچىسى بولۇپ، ئۇ ئوقۇتقۇچىسىنىڭ ئالدىغا چىققانىدى. خۇ جىنرۈي ئىنتايىن ھەيران بولدى ھەم تەسىرلەندى. ئۇ نەسىمە غاپپارنىڭ 1 كۈن كەچكىچە ئايرودۇرۇمدا ئۆزىنى ساقلاپ تۇرىدىغانلىقىنى ئويلاپمۇ باقمىغانىدى، شۇ دەقىقىدە ئۇنىڭدىكى سەپەر ھارغىنلىقى بىردىنلا يوقالغانىدى.
 
  خۇ جىنرۈي نەسىمە غاپپار ۋە ئۇنىڭ نەۋرە ئاكىسىنىڭ ھەمراھلىقىدا غۇلجا ناھىيەسىنىڭ يېڭىتام بازىرى بورچى كەنتىگە بارىدىغان ئاپتوبۇسقا ئولتۇردى.
 
  ئۇلار نەسىمە غاپپارنىڭ ئۆيىگە 8- ئاينىڭ 12- كۈنى كەچ سائەت 9دىن ئاشقاندا كەلگەن بولسىمۇ، نەسىمە غاپپارنىڭ دادىسى، ئانىسى ۋە ئۇرۇق- تۇغقانلىرى ئىشىك ئالدىدا ئۇلارنى ساقلاپ تۇرغانىدى. نەسىمە غاپپارنىڭ ئانىسى مېھمانگۈل نۇرمەمەت دائىم قىزىنىڭ يان تېلېفونىدىن سۈرىتىنى كۆرۈپ تۇرىدىغان خۇ جىنرۈي مۇئەللىمنى بىر قاراپلا تونۇۋېلىپ، ئۇنىڭ ئالدىغا بېرىپ يۈز يېقىپ كۆرۈشتى.
 
  نەسىمە غاپپارنىڭ دادىسى غاپپار ساتتار مېھماننى ئۆيگە تەكلىپ قىلغاچ: بىر كۈن يول يۈرۈپ، ھېرىپ كەتكەنسىز، قېنى ئۆيگە كىرەيلى، دېدى.
 
  خۇ جىنرۈي كاڭدا ئولتۇرۇپ، قىزىق چاي ئىچكەچ، ئوخشىغان لەڭمەننى يېدى ۋە مېۋە- چىۋىلەرگە ئېغىز تەگكۈزدى.
 
  − مەن بۇ يەرگە ئائىلە زىيارىتىگە كەلگەنىدىم، بىراق ئۆزۈمنى ئەزىز مېھمانلاردەك ھېس قىلىۋاتىمەنغۇ، − دېدى خۇ جىنرۈي نەسىمە غاپپارنىڭ ئائىلىسىدىكىلەرنىڭ مېھماندوستلۇقىدىن ئازراق ئەيمىنىپ.
 
  كەچلىك تاماقتىن كېيىن، خۇ جىنرۈي نەسىمە غاپپارنىڭ ئائىلىسىدىكىلەر بىلەن پاراڭلىشىپ ئولتۇرغاچ، نەسىمە غاپپارنىڭ مەكتەپتىكى ئەھۋالىنى سۆزلەپ بەردى.
 
  − مۇشۇنداق ئەلاچى بالىنى بىزنىڭ مەكتەپكە ئەۋەتكىنىڭلارغا كۆپ رەھمەت، نەسىمە غاپپار ئوچۇق- يورۇق، چېچەن قىز، ئۆگىنىشتە ئەستايىدىل، مەكتەپتە ھەر خىل مۇسابىقىلەرگە قاتنىشىدۇ، نەتىجىسىمۇ ئىنتايىن ياخشى، مەن بۇ قېتىم ئۇ تۇرىدىغان مۇھىتنى كۆرۈپ بېقىش ھەم ئۇنىڭ ئاتا- ئانىسىنىڭ قانداق ئوي- پىكىرلىرى باركىن دەپ كەلدىم، مۇشۇنداق بولغاندا مەكتەپمۇ بۇ بالىنى تېخىمۇ ياخشى تەربىيەلەپ چىقالايدۇ، − دېدى خۇ جىنرۈي نەسىمە غاپپارغا بۇ سۆزلەرنى تەرجىمە قىلىپ بېرىشكە ئىشارە قىلغاچ.
 
  ئوقۇتقۇچىسىنىڭ ماختاشلىرىنى ئاڭلاپ، نەسىمە غاپپار ۋىللىدە قىزىرىپ كەتتى، بىراق يەنە ئىپتىخارلىق تۇيغۇسى بىلەن ئوقۇتقۇچىسىنىڭ سۆزلىرىنى ئاتا- ئانىسى، ئۇرۇق- تۇغقانلىرىغا تەرجىمە قىلىپ بەردى. نەسىمە غاپپارنىڭ ئاتا- ئانىسى قىزىنىڭ ئوقۇغۇچىلار ئۇيۇشمىسىدا تەشۋىقات ھەيئىتىلىك ۋەزىپىسىنى ئۈستىگە ئالغانلىقىنى ئاڭلاپ، خۇشال بولۇپ كېتىشتى.
 
  نەسىمە غاپپار خاربىندا ئوقۇغان بىر يىلدىن بۇيان، سىنىپ مۇدىرى خۇ جىنرۈي خۇددى ئۇنىڭغا ئاچىسىدەك كۆڭۈل بولدى، ياردەمدە بولدى. ئۇ ئاغرىپ قېلىپ، ھالىدىن خەۋەر ئېلىشقا موھتاج بولغاندا، خۇ جىنرۈي دائىم ئۇنىڭ يېنىدا پەيدا بولۇپ، ئۇنىڭغا دورا، قايناق سۇ ئەكىلىپ بەردى... شۇغىنىسى بۇلارنى پەقەت نەسىمە غاپپارلا بىلەتتى.
 
  − پارتىيەنىڭ ياخشى سىياسىتى بولمىغان بولسا، بالىلىرىمىز ئىچكىرى ئۆلكىلەرگە بېرىپ ئوقۇش پۇرسىتىگە ئېرىشەلمەيتتى، مەكتەپ ۋە ئوقۇتقۇچىلار بالىلارغا كۆڭۈل بولدى، سىلەرگە كۆپ رەھمەت، سىلەر بىزنىڭ شەرقىي شىمالدىكى تۇغقانلىرىمىز، − دېدى مېھمانگۈل نۇرمەمەت خۇ جىنرۈينىڭ قولىنى چىڭ تۇتۇپ تۇرۇپ.
 
  خۇ جىنرۈي ئائىلە زىيارىتىدىن نەسىمە غاپپار ئائىلىسىدىكىلەرنىڭ تۇرمۇشىنىڭ ئانچە باياشات ئەمەسلىكىنى بىلدى، دادىسى ئىلگىرى سىرتتا ئىشلەمچىلىك قىلاتتىكەن، بىراق ھازىر ئوپېراتسىيە قىلىنغانلىقى ئۈچۈن، ئۆيىدە دەم ئېلىۋېتىپتۇ. نەسىمە غاپپارنىڭ ئاچىسى شىنجاڭ يېزا ئىگىلىك ئۇنىۋېرسىتېتىغا قوبۇل قىلىنىپتۇ، ئىنىسى كېلەر يىلى شىنجاڭ رايون ئىچى تولۇقسىز ئوتتۇرا سىنىپىغا ئىمتىھان بېرىشكە تەييارلىق قىلىۋېتىپتۇ. خۇ جىنرۈي كۆز ئالدىدىكى بۇ ئۈمىدۋار ئائىلىدىن بەكمۇ تەسىرلەندى.
 
  خۇ جىنرۈي مۇخبىرغا: نەسىمە غاپپارنىڭ دادىسى دېھقان، ئۇنىڭ ئۈستىگە قىيىنچىلىقى بولسىمۇ، بالىلىرىنى تەربىيەلەشنى قىلچە بوشاشتۇرۇپ قويماپتۇ، بۇنىڭدىن ئىنتايىن ھاياجانلاندىم، ئالدىنقى ئىككى قېتىم شىنجاڭغا ئوقۇغۇچىلارنى ئالغىلى كەلگىنىمدە، شىنجاڭنىڭ زېمىنىنىڭ كەڭ، مەنزىرىسىنىڭ گۈزەل ئىكەنلىكىنى ھېس قىلغانىدىم، دېدى. ئۇ بۇ قېتىمقى ئائىلە زىيارىتىدىن خېلى كۆپ نەتىجىگە ئېرىشتى ھەم شىنجاڭغا نىسبەتەن يېڭىچە تونۇشقا ئىگە بولدى.
[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى