قىزىق نوقتا خەۋەرلىرى

  بالىلار بۇنداق ئېغىرچىلىقلارنى كۆتۈرمەسلىكى كېرەك

2018-01-08 19:53:17     مەنبەسى: شىنجاڭ خەلق رادىيو ئىستانسىسى   

  ئىلگىرى ئوغلۇم مەكتەپتىن قايتىپ كەلگەندە، ھە دېسىلا مەن بىلەن بىللە ئوينىغىن دەپ چاپلىشىۋالاتتى. راست گەپنى قىلسام، بالامغا كۆپرەك ھەمراھ بولۇشۇم كېرەكلىكىنى بىلەتتىم، بىراق، خىزمىتىم ھەقىقەتەن ئالدىراش بولغاچقا، يېتىشەلمەي، قاتتىق چارچاپ تېرىكىپلا تۇراتتىم. شۇڭا بۈگۈنمۇ روھسىز ھالدا: «ئاناڭنىڭ ئۆلگۈدەك ھېرىپ كەتكەنلىكىنى كۆرۈۋاتقانسەن، چوڭلارنىڭ جاپالىق ئىشلەپ، قانچىلىك ھېرىپ-چارچاپ كېتىدىغانلىقىنى بىلىسەن. مېنىڭ جاپالىق ئىشلىشىم يەنىلا پۇل تېپىپ سېنى مەكتەپتە ئوقۇتۇش ئۈچۈن ئەمەسمۇ؟ سەن چوڭ بولۇپ قالدىڭ، ئاتا-ئاناڭنى چۈشىنىشىڭ كېرەك»دېدىم.
  ئوغلۇم خېلى غەرەز ئۇقاتتى. ئۇ گېپىمنى ئاڭلاپ ئۈندىمەي نېرى كەتتى، ئاندىن جىممىدە ئولتۇرۇپ قالدى، ئۇ قاتتىق ئازار يېگەندەك قىلاتتى. مەن كومپيۇتېردا جەدۋەللەرنى تولدۇرۇپ بولۇپ، ئىختىيارسىز قايرىلىپ قارىدىم، ئوغلۇم يەنىلا بارماقلىرىنى ئويناپ ئولتۇراتتى. «ساڭا ھەمراھ بولۇپ بىردەم ئوينايمۇ؟»دېدىم  مەن. بىراق، ئوغلۇم قىزىقمىغان ھالدا بېشىنى چايقاپ: «ئانا ھېرىپ كەتتىڭ، ئارام ئالغىن، ئۆزۈم ئويناي»دېدى. بۇ گەپنى ئاڭلاپ ئەسلىدە كۆڭلۈم تەسەللىي تاپسا بولاتتى، بىراق ھەرقانچە قىلىپمۇ خوش بولالمىدىم.
  ئوغلۇم ئىلگىرى بەك جانلىق ئىدى، ھازىر ھەددىدىن زىيادە ياۋاش بەك جىمغۇر بولۇپ كەتكەنىدى. كۆڭلۈمنى تىنچلاندۇرغاندىن كېيىن، بىردىنلا سەۋەبنى بىلىۋالدىم: ئەسلىدە مەن ئېغىرچىلىقنى ئوغلۇمغا تاشلاپ بەرگەنىكەنمەن. شۇنداق ئەمەسمۇ؟ بالىمىزنىڭ ئويۇنچۇق ئالغۇسى كەلسە، بىز ئائىلىمىزنىڭ ئىقتىسادىدا قانداق جىددىيچىلىك بارلىقىنى، ئاتا-ئانا بولغۇچىلارنىڭ پۇل تېپىشىنىڭ نەقەدەر قىيىن ئىكەنلىكىنى، تېجەشلىك بولۇشنى بىلىشىمىز كېرەكلىكىنى سۆزلەيدىكەنمىز. بالىمىزنىڭ سۇ ئۈزگۈسى كەلسە، بىز سۇ ئۈزۈشنىڭ نەقەدەر خەتەرلىك ئىكەنلىكىنى، قانچىلىغان ئېچىنىشلىق ھادىسىلەرنىڭ يۈز بەرگەنلىكىنى دەيدىكەنمىز، بالىمىز ئىمتىھاندا تۆۋەن نومۇر ئېلىپ قالسا باشقىلارنىڭ ئىمتىھاننى قانچىلىك ياخشى بەرگەنلىكىنى، ياخشى ئۆگەنمىسە بولمايدىغانلىقىنى ئېيتىدىكەنمىز. كىچىك چېغىمدا ئاتا- ئانام دائىم ئۆزلىرىنىڭ قانچىلىك جاپا تارتقانلىقىنى سۆزلەش ئارقىلىق ماڭا تەلىم بېرەتتى، ھازىرمۇ كۆڭلۈمدە مۇشۇ دەرت بار ئىدى. يۈزەكى جەھەتتىن قارىغاندا، بىز قائىدىلىك بولۇپ، مېھرىبانلىق كۆرسىتىپ، جانلىق مىساللار بىلەن بالىمىزغا جانلىق دەرس ئۆتۈپ، ئۇنىڭغا نۇرغۇن قائىدىنى بىلدۈرەتتۇق. لېكىن، بالامنىڭ پىسخىك ئالاھىدىلىكىگە سەل قاراپتىمەن، يۈكنىڭ ئېغىرىنى ئۇنىڭغا ئارتىپ، ئۇنىڭ كۆتۈرۈش-كۆتۈرەلمەسلىكى بىلەن كارى بولماپتۇ. تەلىم تەربىيىدىكى پاسسىپ ئېنىرگىيەنى بالامغا يەتكۈزسەم، ئۇنىڭدا خىزمەت دېگەن كىشىنى ھاردۇرىدىغان، كىشىنى بىزار قىلىدىغان نەرسە دېگەندەك تەسىراتنى شەكىللەندۈرۈپ قويىدىغانلىقىمغا سەل قاراپتىكەن. ئويلاپ بېقىڭ، ئۇ خىزمەتكە چىققان چاغدا، ئۇنىڭدا خىزمەتكە نىسبەتەن قورقۇنچ بولسا، خىزمەت دېگەن كۆڭۈللۈك نەرسە دېگەن ئۇقۇمنىڭ بولۇشى مۇمكىنمۇ؟ بالىلارنىڭ چۈشىنىش قابىلىيىتىگە سەل قارىساق، كۆرۈنۈشتە ئۇلار چۈشەنگەندەك ۋە گەپ ئاڭلىغاندەك قىلغىنى بىلەن، ئەمەلىيەتتە شۇنداق بولۇشى ناتايىن، بەلكى ئۇلار پەقەت چوڭلارنىڭ كەيپىياتى تەرىپىدىن قورقۇتۇۋېتىلگەن بولىدۇ. شۇنىڭ بىلەن كېيىنكى كۈنلەردە ئۇلار ھەممە ئىشتا تولىمۇ ئېھتىياتچان، ئۆزىگە بولغان ئىشەنچىسى يېتەرسىز بولۇپ، جىمغۇرلىشىپ كېتىدۇ.
   بۇلارنى چۈشەنگەن ھامان ئۆزۈمگە كايىشقا باشلىدىم: چوڭلارنىڭ ئېغىرچىلىقىنى نېمىشقا بالامغا تاڭغاندىمەن؟ ئۇ ئېغىرچىلىقلاردىن پايدىلىنىپ،ئەسلىدە بالامغا مەنسۇپ بولغان خۇشاللىق ۋە ئەركىنلىكنى تارتىۋېلىشىم نەقەدەر رەھىمسىزلىك ۋە شەخسىيەتچىلىك ھە! جىمىپ كەتكەن بالامغا قاراپ، دادىللىق بىلەن ئەپۇ سورىدىم، ئاندىن ئۇنى قۇچاقلىغىنىمچە دومىلاپ ئوينىدىم، مەن خۇشاللىق ۋە ئازادىلىكنىڭ ئوغلۇمنىڭ قەلبىگە قايتىپ كېلىشنى ئۈمىد قىلدىم .ئوغلۇم ئاخىرى كۈلدى. ئاتا- ئانىلار ئېغىرچىلىقنى بالىلىرىمىزغا تاشلاپ بەرمەيلى، ئۇلارغا كۆڭۈللۈك بالىلىقنى قايتۇرۇپ بېرەيلى.

[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
2018-يىلى 1-ئاي
2018-يىلى 2-ئاي
2017-يىلى 11-ئاي
2017-يىلى 12-ئاي
2018-يىلى 3-ئاي
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى