قىزىق نوقتا خەۋەرلىرى

روھىي بېسىمنى يۈك قىلىۋالماڭ

2018-01-11 19:58:53     مەنبەسى: شىنجاڭ خەلق رادىيو ئىستانسىسى   

ياشاش سەنئىتى توغرىسىدىكى بىر قېتىملىق لېكسىيەدە، پروفېسسور سۇ قاچىلانغان ئىستاكاننى قولغا ئېلىپ، ئاڭلىغۇچىلاردىن:
- پەرەز قىلىپ بېقىڭلار، بۇ ئىستاكاننىڭ ئېغىرلىقى قانچىلىك؟،-دەپ سوراپتۇ؟
ــ 50 گرام.
ــ100 گرام.
ــ 125گرام.
كۆپچىلىك بەس بەستە جاۋاب بېرىپتۇ.
ــ ئۇنىڭ ئېغىرلىقىنىڭ قانچىلىك ئىكەنلىكىنى مەنمۇ بىلمەيمەن، بىراق ئۇنى بىردەم كۆتۈرۈپ تۇرسىڭىز، ئازراقمۇ ھارغىنلىق ھېس قىلمايدىغانلىقىڭىزنى جەزملەشتۈرگىلى بولىدۇ،-دەپتۇ پروفېسسور. ئەمدى مېنىڭ سورايدىغىنىم:
ــ ئەگەر ئۇنى بىر نەچچە مىنۇت كۆتۈرۈپ تۇرسام، نەتىجە قانداق بولۇشى مۇمكىن؟
ــ باشقىچە ئىش بولمايدۇ،- دېيىشىپتۇ كۆپچىلىك.
ــ ئەمىسە، ئەگەر مۇشۇنداق كۆتۈرۈشنى بىر سائەت داۋاملاشتۇرسام قانداق بولۇشى مۇمكىن؟
ــ بېلىكىڭىز ئازراق تالىدۇ،- دەپ جاۋاب بېرىپتۇ بىر ئاڭلىغۇچى.
ــ توغرا دېدىڭىز، ئەگەر بىر كۈن كۆتۈرۈپ تۇرسامچۇ؟
ــ بىلىكىڭىز چۇقۇم ئۇيۇشۇپ قالىدۇ، مۇسكۇللىرىڭىز تارتىشىپ قېلىشى مۇمكىن، ۋاقتى كەلگەندە دوختۇرخانىغا بېرىشىڭىزغا توغرا كېلىشى مۇمكىن،- دەپتۇ يەنە بىر ئاڭلىغۇچى.
ــ ناھايىتى ياخشى. ئىستاكاننى كۆتۈرۈپ تۇرغىنىمىزدا ۋاقىت ئۇزاق ياكى قىسقا بولۇشىغا يارىشا، ئىستاكاننىڭ ئېغىرلىقىدا ئۆزگىرىش بولامدۇ؟
 ــ بولمايدۇ.
ــ ئۇنداقتا، ئىستاكاننى كۆتۈرگەن قول نېمە ئۈچۈن تالىدۇ؟ مۇسكۇللار نېمە ئۈچۈن تارتىشىپ قالىدۇ؟ بۇنىڭ ئۈچۈن قانداق قىلىشىم كېرەك؟
ــ بۇنىڭ جاۋابى ناھايىتى ئاددىي، ئىستاكاننى قويۇپ قويۇشىڭىز كېرەك،- دەپ جاۋاب بېرىپتۇ يەنە بىر ئاڭلىغۇچى.
ــ تامامەن توغرا،- دەپتۇ پىروفېسسور،- ئەمەلىيەتتە، تۇرمۇشتىكى مەسىلىلەر بەزىدە قولۇمدىكى ئىستاكانغا ئوخشاپ كېتىدۇ. ئۇلارنى قەلبىڭىزدە بىر نەچچە مىنۇت تۇرغۇزسىڭىز كارايىتى چاغلىق. ئەگەر ئۇزاق ۋاقىت خىيالىڭىزدىن نېرى قىلمىسىڭىز، ئۇلار سىزنىڭ روھىيىتىڭىزنى خورىتىۋېتىشى مۇمكىن. ۋاقىت شۇ يوسۇندا ئۆتۈۋەرسە، سىز روھىي جەھەتتىن ۋەيران بولۇشىڭىز مۇمكىن. ئۇ چاغدا سىز ھېچقانداق ئىشنى قىلالمايدىغان بولۇپ قالىسىز. تۇرمۇشتىكى مەسىلىلەرگە جەزمەن ئېتىبار بېرىش كېرەك، ئەمما دائىم بولۇپ قېلىپ يۈدۈپ يۈرۈشكە ھەمىشە ئويلاپ يۈرۈشكە بولمايدۇ. مۇۋاپىق ۋاقىتتا ئۇلارنى قويۇپ تۇرۇپ، ئارام ئېلىشىمىز كېرەك. بولمىسا، ئۆزىمىزمۇ سەزمىگەن ھالدا مەسىلىلەر تەرىپىدىن نابۇت قىلىنىپ كېتىمىز.
تۇرمۇشىمىزدا مۇۋاپىق بېسىم ۋە باشقا روھىي ھالەت ئۆزگىرىشلەرنىڭ بولۇشى نورمال بىر ھادىسە. بىراق، شۇ خىرىس بېسىملارنى دائىم كاللىغا قاچىلىۋېلىپ، ئۇنى يۈك قىلىۋېلىشنىڭ ھاجىتى يوق. «چوڭ چوڭ توغاننى بۇزغان كىچىككىنە چۆمۈلە ئۇۋىسى» دېگەندەك غەم قايغۇنى يۈدۈپ يۈرگەندە ئىنسان كاللىسى شۇ بېسىم ئالدىدا بىچارىلەرچە باش ئېگىپ، ئاخىرىدا ھېچ ئىش قىلالمايدىغان ئەرزىمەس بىر نېمىگە ئايلىنىپ قېلىشى مۇمكىن.
ھازىر جەمىئيىتىمىزدە تۈرلۈك روھىي كېسەللىكلەرگە گىرىپتار بولۇۋاتقان پىسخىك تەڭپۇڭسىزلىقلارغا ئۇچراپ گاڭگىراپ يۈرۈۋاتقانلارنى يوق دېگىلى بولمايدۇ. ئويلاپ باقساق، ھەر قانداق بىر نورمال تەپەككۇرغا ئىگە ئادەم ئۆز روھىيىتىنى تامامەن ئۆزى كونترول قىلىش ئىمتىيازغا تولۇق ئىگە. ئادەم ئۆز ئىدىيىسىنى ئۆزى باشقۇرالمىسا، ئۇ ھېچنېمىنى باشقۇرالمايدۇ. بېسىمغا ئۇچرىغان كىشى شۇ بېسىمنىڭ بىر ئۆزىگىلا كەلمەيۋاتقانلىقىنى، ھەتتا چىدىغۇسىز ھالەتكە چۈشۈپ قالغان ئادەملەرنىڭمۇ شۇ بېسىمنى يېڭىپ، يەنىلا ئۈمىدۋارلىق بىلەن ئالغا قاراۋاتقانلىقىنى بىلگەندە، بېسىم ئالدىدا بىچارىلەرچە قول قوۋۇشتۇرۇپ تۇرغانلىقىدىن خىجىللىق ھېس قىلىشى، ئۆز روھىيىتىنى تەڭشەپ، تۈرلۈك روھى بېسىملارنى چوقۇم ئارقىغا تاشلاپ، دادىللىق بىلەن يېڭى مەنزىللەرگە يۈرگىلى بولىدىغانلىقىنى ھېس قىلىشى كېرەك.
چۈنكى بۇ ھايات بىزگە ئاچچىقىنى بېرىش بىلەن بىرگە تاتلىقنىمۇ قوشۇپ بەرگەن. بەلكىم شۇ ئاچچىق بولمىسا تاتلىقنىڭ تەمىنى، قەدىرنى بىلمەسلىكىمىز مۇمكىن. شۇڭا ھاياتتا كۈلپەت چەكسەكمۇ ھەر خىل روھىي بېسىم ئالدىدا تېز پۈكمەسلىكىمىز، ئۇنىڭغا دادىل يۈزلىنىپ ئۇنى ئالغا ئىلگىرلەشنىڭ پەلەمپىيى قىلىشىمىز كېرەك. شۇنداق قىلالىساقلا، ئۆز مەۋجۇتلۇقىمىزنى، قىممىتىمىزنى نامايەن قىلالايمىز.

[an error occurred while processing this directive]
[an error occurred while processing this directive]
[an error occurred while processing this directive]
نادىر ناخشا – مۇزىكىلار
تور بېتىمىزدىكى يېڭىلىقلار
رادىيو دىراممىسى
بۇ بەتنىڭ نەشىر ھوقۇقى شىنجاڭ خەلق رادىيو ئىستانسىسىغا تەۋە
ئالاقىلىشىش نومۇرى: 2571553، 2578492
ئادرىسىمىز: ئۈرۈمچى شەھىرى ئىتتىپاق يولى 830- نومۇر شىنجاڭ خەلق رادىيو ئسىتانسىسى تور مەركىزى